Tsoko.Nut Batirol Review

Ang daming tao sa SM North EDSA kahapon. Naghahanap ako kung saan kami pwedeng mag-lunch. Umakyat ako sa 3rd Floor. Nakita ko yung Tsoko.Nut Batirol. Walang tao don kaya don ko na lang pinili kumain para hindi kami ma-late sa papanoorin naming movie.

Kami lang 'yung customers nila nung time na 'yun. Sa lahat yata ng food shop don sa SM. Sila lang ang hindi busy ng lunchtime. Siguro nga, dahil sa location nila. Hindi lahat ng tao ay may patience para umakyat pa sa third floor ng SM North EDSA.

Maganda sana yung place. Tahimik. Ideal siya kung me date kayo or ka-business transaction at ayaw nyo ng maingay. Nakaka-disappoint lang ng konti na hindi malinis yung tables nila. Hindi naman ganon karami 'yung table nila para ma-overlook pa nilang hindi mapunasan kasi maliit lang nga 'yung place. For a place na hindi ganon ka-busy, sana nami-maintain na nila 'yung pagiging tidy ng lugar.

Sabi nung waitress, Tsokolate ang bestseller nila. Pero hindi kami umorder non. Kumuha kami ng Spaghetti in Chunky Meat Sauce, Callos, Dinuguan with Rice, Pine-Orange Java at 'yung Rootbeer Float. Siguro mga around 10 to 15 minutes din bago dumating ang order.

'Yung Dinuguan with Rice ang inorder ko for myself. 118 pesos siya. Tama lang ang timpla nung Dinuguan. Hindi siya matabang. Hindi rin naman siya sobrang maasim. Hindi sila nagkakalayo ng lasa ng Dinuguan ng Goldilocks. 'Yun nga lang, ang daming taba! In fairness, malambot naman 'yung laman nung pork. Hindi effort sa pagnguya kahit me braces ako. Sa halagang 118 pesos, I don't feel short changed naman. Pero kung nagtitipid at okay lang pumila para maka-order, mas mabuti pang mag-Goldilocks na lang kayo kung trip nyo ng dinuguan with rice.

'Yung Callos naman 'yung inorder ng aking bf :) 130 pesos siya. Sabi niya, familiar daw yung taste. Parang yung lasa ng Century Tuna Mechado. Hindi niya maisip tuloy kung sobrang low-class ba ng pagkakaluto na naglasang de-lata 'yung Callos ng Tsoko.Nut Batirol or sobrang sosi ang pagkakaluto ng Century Tuna Mechado at papasa siya as a dish sa isang restaurant. Kagaya nung Dinuguan nila, ang dami ring taba nung Callos. Kung gusto niyo ng healthy dish na kasing-lasa ng Callos ng Tsoko.Nut Batirol, mag-Century Tuna  Mechado na lang kayo. Siguradong walang taba at mas mura pa.

Spaghetti in Chunky Meat Sauce naman yung inorder ng mga pinsan ng bf ko. 115 pesos naman ang isang order. Hindi ko alam kung nasarapan ba talaga sila kasi parang ang lungkot-lungkot nila pareho habang kumakain, Pero naubos naman nila 'yung Spaghetti so siguro okay din naman 'yung lasa.

For the drinks, umorder ang bf ko ng 1.5 liters na Pine-Orange Java. 150 Pesos yung isang pitsel nila na mukhang flower vase :)) Tumikim lang ako ng isang sip. May nostalgic effect siya sa 'kin. Parang naaalala ko yung elementary days na umiinom ako ng juice na naka-tetra pack. Ang difference lang is me sliced orange 'yung ininom namin sa Tsoko-Nut at nakabaso siya. Hindi namin siya naubos. Ang dami pang natira so sayang lang.

Nag order din ng 'yung pinsan ng bf ko ng Rootbeer Float. Sabi niya, lasang marshmallow yun float. Hindi ko natingnan kung magkano 'yung rootbeer float siguro nasa 100 plus pesos din siya kasi umabot ng mahigit 700 yung bill naming apat.

Maganda ang interior ng Tsoko-Nut Batirol sa SM North EDSA. Pero sana ma-maintain nila na malinis siya palagi. At sana, bumili na sila ng mga bagong magazines kasi punit-punit na 'yung iba nilang copies. Sa presyo,  hindi ka naman sobrang talo kasi somehow masarap naman siya pero may kamahalan talaga. Maraming restaurants and food shops na nag-ooffer ng parehong dishes sa mas murang halaga at mas marami pa ang serving.

Blushing Cupcakes Review

Nakatapos na naman ako ng isang linggo sa trabaho. :) At syempre, "Sweldo Day" din ngayon. Habang naglalakad ako sa SM North, iniisip ko na kung anong reward 'yung ibibigay ko sa sarili ko. Inisip ko kung bibili ako ng Chilled Taho sa Soya Bar pero tinamad na akong umakyat. Nagkataon naman na nadaanan ko yung stall ng Blushing Cupcake sa me The Block. Eto yung malapit sa me escalator at sa Body Shop. Nung isang araw ko pa kasi gustong ma-experience 'yun. :)

Ang dami nilang variants. Sabi nung tindera, ang bestseller nila ay yung blueberry and yung carrot cupcake. 'Yung mini-cupcakes lang na tig-4 sa isang kahon un binili ko. Syempre, titikman ko lang muna para hindi sayang yung pera.

Cute yung kulay ng kahon nila. At yung logo nila parang familiar. Sila rin kaya ang may-ari ng Blushing Brides (HMUA at Wedding Planner)? Wala lang naisip ko lang. Hehe.

44 pesos ang isang kahon ng mini cupcake nila. 4 na yung laman. Pwede ka pumili ng flavors :) Hindi ko matandaan kung ano 'yung tamang tawag sa variants nila pero from left to right ng picture, pinili ko 'yung Chocolate, Blueberry, Carrot Cake at Buttercream.

'Yung Chocolate ang una kong tinikman. Syempre, favorite ko ang chocolate. Hindi sobrang tamis 'yung icing niya para sa akin pero dahil mini-cupcake yun at mas marami pa yung icing kesa don sa tinapay, nakaka-overwhelm pa rin 'yung tamis. Halos hindi ko na nalasahan 'yung pinaka-cake.

Next kong kinain is 'yung Blueberry. Moist siya and masarap 'yung cake. 'Yung icing, nakakasuya pa rin pero not as much nung pagkasuya ko don sa Chocolate. Mas nalasahan ko yung cake this time.

After ko kainin 'yung dalawang mini-cupcake, nasusuya na ako dahil sa icing :)) Tinitingnan ko pa lang yung icing nung Carrot Cupcake at nung Buttercream, nanlalambot na ako. Ang ending, binigay ko na lang sa mommy at daddy ko at tinanong ko kung ano'ng lasa. Masarap naman daw. :))

Okay na rin siya sa halagang 44 pesos kahit halos kasinglaki lang ng 5 pesos 'yung bilog nya. At least, somehow, pwede nang matikman agad 'yung 4 sa marami nilang cupcake flavors. Maganda din naman 'yung kahon nila at presentable tingnan. Magandang ipang-regalo. Hindi ko naman na-feel na nadaya ako sa price at sa lasa. 'Yun nga lang, parang ayoko na bumili uli dahil sa icing na mabilis makasawa. Siguro, mas maaappreciate ko kung 'yung regular sized cupcakes yung binili ko. Kasi mas malalasahan ko siguro yung cake. 33 pesos to 36 pesos 'yung price ng cupcakes na nakita ko. Pero pag mas madami kang binili, mas mababa na 'yung price.

Kung mahilig ka talaga sa matatamis, I would recommend that you try their cupcakes. Pero pag hindi ka fan ng sweets, you will probably end up giving them away dahil sa icing. :)